Gipahigayon sa Sangguniang Panlalawigan ning probinsya ang Joint Public Hearing alang sa Proposed Provincial Ordinance No. SP 26-02 didto sa SP Session Hall, 2nd Floor, Provincial Legislative Building, Capitol Site.
Ang Committee on Laws, Rules, Privileges and Style ug ang Committee on Police, Peace and Order mao ang mipasiugda sa nahisgutang kalihokan nga nagtuki sa Proposed Provincial Ordinance Establishing and Institutionalizing a Drug-Free Workplace Policy in the Provincial Government of Zamboanga del Norte and Providing Guidelines in the Implementation thereof and for Other Purposes.
Kining maong ordinansa ang nahasubay sa panglantaw ug tinguha ni Governor Darel Dexter T. Uy nga ang kinatibuk-ang probinsya makalingkawas sa kadaut nga dala sa ginadiling droga. Tinguha nga mawala ang pag-abuso sa droga sa tanang mga kawani ug personahe sa kapitolyo hinungdan sa pagka-umol ning nahisgutang ordinansa.
Si 2nd District Board Member, Atty. Peter Co ang nangulo isip Presiding Officer sa gihimong public hearing inubanan nila ni BM Chady Yebes, BM Michael Documento ug BM Dario Mandantes. Mitambong niini ang mga personahe ug mga pangulo gikan sa DILG, PDEA, PADAC, BJMP, PNP-ZNPPO, OPAg, mga hepe sa lain-laing mga buhatan sa kapitolyo, mga sakop sa media ug mga representante sa ubang mga ahensya nga may kalabutan sa maong ordinansa.
Gipasalamatan ni BM Co ang tanang nanambong ug mitampo sa ilang mga obserbasyon ug komento nga nakatabang sa pagpalig-on sa gi-proposar nga ordinansa paghimo sa probinsya sa Zamboanga del Norte nga ‘drug-free’.
Human sa public hearing, ibalik ang maong ordinansa sa komitiba sa SP nga nagpasiugda niini aron ma-tukma ang mga detalye nga makapahapsay sa implementasyon niini.
Photo Courtesy: Zamboangadelnorte.gov.ph
