Aktibong gipahigayon karon sa lokal nga gobyerno sa Manolo Fortich ang Operation Timbang Plus (OPT) Data Quality Check aron masiguro ang katukma ug kasaligan sa datos kabahin sa nutrisyon sa kabataan.
Sumala ni Rikkie Mae Lucero, Municipal Nutrition Action Officer, ang kalihokan gipangunahan sa Municipal Nutrition Office uban sa ilang team nga mosuroy sa nagkadaiyang barangay sulod sa unom (6) ka adlaw.
Tumong sa maong operasyon nga i-validate ug i-assess ang mga report nga gisumite sa Barangay Nutrition Committee ug Barangay Nutrition Scholar, ilabina sa datos sa mga bata nga edad lima (5) anyos paubos.
Gitan-aw usab niini kung naabot ba sa matag barangay ang ilang target sa pagtimbang ug pagmonitor sa kahimtang sa nutrisyon sa kabataan
Dugang pa, gipasabot ni Lucero nga pinaagi sa hugot nga validation process, masiguro nga ang tanang datos nga nakuha sa Operation Timbang Plus tukma, ensakto, ug mapuslanon isip basehan sa mga programa sa panglawas ug nutrisyon sa komunidad.
Padayon ang paningkamot sa lokal nga gobyerno aron mapalambo ang kahimtang sa nutrisyon sa mga bata ug mapalig-on ang mga programa nga nagpunting sa ilang kaayohan
Photo Courtesy: LGU – Manolo Fortich
