Nakaukit og kasaysayan sa national sports team sa Pilipinas ang Sibol, human makasungkit og duha ka bronze medals sa inaugural Southeast Asia Esports Nations Cup o SNC 2026 nga gipahigayon sa Ho Chi Minh City, Vietnam.
Ang maong torneyo nga giorganisar sa Southeast Asia Esports Federation, gisugdan niadtong Mayo 8 hangtod 9, sa Saigon Exhibition and Convention Center isip kabahin sa Vietnam GameVerse 2026 diin nag tigi ang 11 ka nasud sa Southeast Asia.
Nakapuwesto sa ikaunom ang Pilipinas sa overall rankings uban ang 75 puntos, nga gipasiugda sa bronze medal finishes sa PUBG Mobile Solo ug CrossFire: Legends.
Si Francis Fusingan o mas nailhang “RANGE” maoy nangulo sa kampanya sa Pilipinas human makadaog og bronze medal sa PUBG Mobile Solo event. Matod pa niya, dako niyang garbo ang pagrepresentar sa nasud ug pagdala og medalya alang sa Pilipinas.
Dugang pa sa kampanya sa Sibol, nakakuha usab kini og bronze medal sa CrossFire: Legends human makaabot sa semifinals sa team-based FPS event. Si John Clarence Rivera o “Jayzee” miingon nga dakong oportunidad alang sa mga mobile FPS players ang pagkahimong kabahin sa usa ka national competition format.
Bisan pa sa kusog nga kompetisyon gikan sa mga nasud sama sa Vietnam ug Indonesia, gipakita sa Pilipinas nga makahimo kini og kusog nga pakigbatok sa regional esports scene.
Sa final standings, nangulo ang Indonesia nga adunay lima ka medalya samtang ikaduha ang host country nga Vietnam. Matod ni Jab Escutin, bisan pa og adunay aspeto nga kinahanglan pa mapalambo, gipakita sa Sibol nga usa gihapon ang Pilipinas sa mga lig-on nga contenders sa esports sa Southeast Asia.
Photo Courtesy:Philstar
