Miresulta sa kinatibuk-ang 118 ka citation ug usa ka impounded nga sakyanan ilawom sa operasyon sa “Oplan Pukot Sakyanan” nga gipahigayon sa nagkadaiyang police stations sa Davao del Norte niadtong Mayo 12, 2026.
Base sa accomplishment report sa Davao Norte Police Provincial Office (DNPPO) ubos sa R.A. 4136 ug mga may kalabutang municipal ordinances, 90 ka operasyon ang gihimo sa tibuok probinsya.
Sa kampanya kontra sa “No Helmet, No Travel,” nakahatag usab ang mga otoridad og 95 ka citation ug 13 ka TOP o Temporary Operator’s Permit.
Samtang ang IGACOS Police Station ug Kapalong Municipal Police maoy pinakataas nga kaso nga adunay 22 ka violation matag usa.
Samtang sa “No Plate, No Travel” nga kampanya, duha ka citation ug tulo ka TOP ang natala sa maong operasyon.
Sumala sa kapulisan, padayon ang implementasyon sa “Oplan Pukot Sakyanan” aron mapalig-on ang kaluwasan sa kadalanan ug masiguro ang pagsunod sa balaod-trapiko sa nasangpit nga probinsya.
Photo Courtesy : Davao Norte Police Provincial Office
