Nasakmit sa mga otoridad ang illega nga drogang shabu nga mokabat sa ₱34,000 ang kantidad human sa gihimong joint buy-bust operation sa Barangay Maharlika, Hinatuan, Surigao del Sur, Mayo 12, 2026.
Ang operasyon gipangulohan sa Hinatuan Municipal Police Station ubos sa superbisyon ni PCPT Joey C. Monato, Acting Chief of Police, kauban ang mga personahe sa Philippine Drug Enforcement Agency (PDEA) Surigao del Sur.
Nasikop sa maong operasyon ang usa ka 31-anyos nga lalaki, residente sa Barangay Bitoon, Hinatuan, Surigao del Sur human giingong nalambigit sa illegal drug transaction atol sa buy-bust operation.
Nasakmit gikan sa suspek ang upat ka heat-sealed transparent plastic sachet nga naglangkob og giingong shabu, nga adunay total nga gibug-aton nga mga 5 gramos, kauban ang buy-bust money ug uban pang drug paraphernalia.
Ang mga nakumpiska nga ebidensya gi-inventory ug gi-markahan sa presensya sa mga opisyal sa barangay ug representante sa media, samtang ang suspek gipasakaan na og kaso ug anaa na sa kustodiya sa kapulisan alang sa tukmang disposisyon.
Photo courtesy: Hinatuan MPS
