Nadakpan na sa mga otoridad ang usa ka lalaki nga gipasanginlang responsable sa pagpangawat sa usa ka pharmacy sa Abarca Street, Barangay Mangagoy, Bislig City.
Ang operasyon gihimo sa Bislig Component City Police Station (CCPS) ubos sa pagpanguna ni Acting Chief of Police PLTCOL Jassen N. Tuario. Nadakpan ang suspek pipila lamang ka oras human sa nahitabong pagpangawat niadtong nakalabay nga adlaw.
Base sa imbestigasyon, nadiskobrehan sa manager sa maong pharmacy ang kagubot sulod sa establisyemento pag-abot niini sa buntag. Nakita usab ang dakong lungag sa kisame nga gituohang gigamit sa suspek aron makasulod.
Gituohang migamit og “tigib” ang kawatan aron mabungkag ang atop ug kisame sa establisyemento. Nakuha sa suspek ang cash nga mokabat sa halos ₱40,000.
Pinaagi sa CCTV footage ug testimonya sa usa ka testigo, dali nga nailhan sa kapulisan ang suspek. Gilayon usab nga gilunsad ang hot pursuit operation nga miresulta sa iyang pagkadakop didto sa Public Market sa Barangay Mangagoy sa mao gihapong adlaw.
Sa pagkakaron, gipasakaan na og kasong “Robbery with Force Upon Things” ang suspek ug anaa na kini sa kustodiya sa Bislig City Police Station samtang nagpaabot sa sunod nga legal nga proseso.
Photo courtesy: Vecteezy
