Viral ahora na social media el un video donde ya man talabangan el maga motorista con un persona quien asegun ya man juramentao agarando con un cuchillo y ya empesa hace apas con el maga hente quien ta pasa na vicinidad del San Jose gusu junction road del ayer pasada alas 4 del tarde.
Con el suspechao ya identifica como si Allan Capala Porcadilla, 32-anyos soltero y residente des del Ormoc City. Base na report, ya prinsipya asegun el suspechao caosa strendo na lugar que donde ta hace miedo con el maga quien ta pasa agarando con un cuchillo y notable asegun que dol lo mismo nohay este na su pensamiento.
Visible tambien na video que ta precura pa con este man cuento el maga autoridad pero mas ta queda este agresivo rason si porque ya man talabangan con ele el maga motorista hasta totalmente ya puede con ele agara el autoridad y confisca su cuchillo.
Herido el suspechao porcaosa con el golpe y maga las cosas como maga helmet ta buta contra conele. Mientrastanto el suspechao na custodia ya del ZCPS-11 central para el propio despocicion.
