Nasakmit sa Philippine National Police Aviation Security Group ang walo ka abandonadong inbound parcels nga adunay gituohang marijuana kush atol sa interdiction operation sa Central Mail Exchange Center sa Pasay City niadtong Mayo 11, 2026.
Sumala sa kapulisan, ang mga parcel gikan sa United States ug gi-deklarar lamang isip ordinaryong personal nga mga gamit sama sa sinina, libro, ug kalendaryo.
Apan atol sa inspeksyon, nadiskubre ang kapin 3.4 kilos nga gituohang pinauga nga dahon sa marijuana nga adunay balor nga kapin P5.1 milyon base sa standard drug price.
Nadiskubre ang ilegal nga substansiya pinaagi sa routine cargo x-ray screening, K-9 inspection, ug manual verification nga hiniusang gihimo sa airport interdiction personnel, Bureau of Customs, ug Philippine Drug Enforcement Agency.
Gikumpirma usab nga abandonado ang mga parcel ug karon anaa na sa kustodiya sa PDEA alang sa hustong disposisyon ug dugang imbestigasyon.
Gidayeg ni PGen. Jose Melencio C. Nartatez Jr. ang mga operating units ug partner agencies tungod sa ilang pagka-alerto ug maayong koordinasyon batok sa pagpang-smuggle og ilegal nga droga sa nasud.
Photo Courtesy : PNP PIO-FB
