Gimando ni Agriculture Secretary Francisco Tiu Laurel Jr. ang pagpalig-on sa mga programa aron mapanalipdan ang mga mag-uuma ug konsumidor batok sa epekto sa grabeng hulaw.
Matod pa sa kalihim, gamiton sa gobyerno ang mga leksyon nga ilang nakat-unan atol sa El Niño niadtong 2024, aron malikayan ang dako nga kadaot sa agrikultura karong panahona. Lakip sa ilang gipakusgan mao ang paggamit sa solar-powered irrigation, mas sayong pagpugas, ug pagtukod og low-cost greenhouses aron maminusan ang epekto sa kakulang sa tubig.
Gidasig usab sa DA ang pagtanom og mga pananom nga dili kaayo kinahanglan og daghang tubig sama sa monggos ilabi na sa mga lugar nga dali maigo sa hulaw.
Gisugdan na usab sa ahensya ang pagsusi sa mga irrigation system, climate risk mapping, ug pagtipig sa mga binhi nga makasugakod sa hulaw.
Samtang, giandam usab sa gobyerno ang dugang suporta ilawom sa National Rice Program sama sa climate-resilient seeds, abono, makinarya, irigasyon, water-saving technologies ug pautang alang sa mga mag-uuma.
Una nang gipahimangno sa DA nga posibleng mokunhod ngadto sa 18.8 million metric tons ang produksyon sa humay tungod sa “super” El Niño ug pagsaka sa presyo sa abono ug gasolina. Posible usab nga modako ang importasyon sa bugas aron maseguro ang suplay sa nasud.
Photo courtesy: Philstar
