Nagpadala og kinatibuk-an nga 916 ka mga sundalo ang 401st Infantry Brigade aron mosiguro sa seguridad sa umaabot nga Palarong Pambansa 2026 nga ipahigayon sa Mayo 24 hangtod 31 sa Patin-ay, Prosperidad, Agusan del Sur.
Matod sa 401st IBde, ang ilang misyon mao ang paghatag og luwas nga palibot alang sa gibanabana nga 20,000 ka mga atleta, coaches, opisyal, ug mga spectators nga motambong sa national games.
Ang mga tropa gi-deploy na niadtong Lunes sa mga strategic nga lugar sama sa mga competition venues ug mga billeting quarters sa probinsya.
Kabahin ang maong pwersa sa gibanabana nga 2,000 ka personnel nga multi-agency task force nga gilangkuban sa Philippine Army, Philippine National Police, ug mga support units gikan sa mga lokal nga gobyerno.
Matod ni Col. Glenn Joy U. Aynera, commander sa 401st IBde, dako ang ilang pasidungog nga mahimong “shield” sa Palarong Pambansa 2026 ug ilang gipaniguro ang kaluwasan sa tanang moapil ug bisita sa Agusan del Sur.
Samtang, nag-deploy usab ang Police Regional Office sa Caraga o PRO-13 og 700 ka mga personnel alang sa seguridad sa maong dula.
Matod ni PMaj. Jennifer Ometer, head sa PRO-13 information office, gikan sa 700 ka personnel, 300 gikan sa nagkalain-laing probinsya, samtang 400 bag-ong gradwado gikan sa basic police training.
Dugang pa niya, sa 300 ka personnel gikan sa mga probinsya, 120 gikan sa Regional Mobile Force Battalion, 50 matag usa gikan sa Agusan del Norte, Surigao del Norte, ug Surigao del Sur, ug 30 gikan sa Butuan City.
Photo courtesy: 401st IBde
