Dako ang pasasalamat sa usa ka pintor human nagmalampuson ang iyang hand transplant operation.
Giila ang maong pintor nga si Raj Kumar, 45-anyos, naputlan og duha ka kamot human sa aksidente sa tren niadtong 2020, nakabalik pag-usab sa paglaom ug sa iyang pinalanggang pagpintal pinaagi sa usa ka talagsaong operasyon sa hand transplant sa Sir Ganga Ram Hospital.
Sulod sa upat ka tuig, wala na niya mahikap ang mga brush nga kaniadto naghatag kinabuhi sa iyang mga obra. Apan, niadtong Enero 2024, nahimo siyang benepisyaryo sa unang malampusong bilateral hand transplant sa Delhi ug sa amihanang bahin sa India.
Gikan matod pa ang mga kamot nga iyang nadawat sa usa ka retiradong Vice Principal nga gideklarang brain-dead. Sa wala pa siya namatay, klaro na niyang gipahibalo sa iyang pamilya ang iyang tinguha nga mag-donar sa iyang lawas, aron makatabang sa uban. Gituman kini sa iyang pamilya human sa iyang kamatayon.
Bisan wala magkaila ang duha, ang ilang kinabuhi nagkonektar pinaagi sa maong donasyon nga nakahatag og bag-ong higayon sa pintor.
Pagkahuman sa operasyon ug rehabilitasyon, gipagawas siya sa ospital sa sayong bahin sa Marso 2024. Atubangan sa media, iyang gipakita ang “double thumbs-up”, simbolo sa iyang pagbalik sa normal nga kinabuhi ug sa paglaom nga makapintal pag-usab.
Sumala sa mga doktor, ang maong operasyon usa ka dakong kalampusan sa natad sa transplant surgery sa India ug nagpakita sa importansya sa organ ug body donation.
Dugang niini, ang maong istorya sa pintor ug sa donor naghatag inspirasyon sa daghang tawo, nga usahay, ang pinakadakong bili nga atong mahimo dili materyal nga butang, kundili usa ka desisyon nga makaluwas ug makahatag og bag-ong kinabuhi sa uban.
Photo Courtesy : Reddit
