Gihingusgan sa mga foreign ug trade ministers sa ASEAN ang usa ka koordinado nga tubag sa rehiyon batok sa nagkagrabeng panagbangi sa Middle East, samtang gipasidan-an nila ang posibleng dakong epekto niini sa energy security, suplay sa pagkaon, patigayon, ug kaluwasan sa mga ASEAN nationals nga nagtrabaho sa gawas sa nasod.
Gihisgutan kini atol sa ASEAN Joint Foreign and Economic Ministers’ Meeting nga gipangulohan sa kalihim sa foreign affairs ug trade sa nasod isip kabahin sa ika-48 nga ASEAN Leaders’ Summit dinhi sa Sugbo kagahapong adlawa, Mayo 7.
Atol sa miting, giawhag ni Foreign Affairs Secretary Ma. Theresa Lazaro ang tanang kampo nga nalambigit sa panagbangi sa Middle East nga isalikway ang gubat ug pilion ang malinawon nga negosasyon aron masulbad ang ilang mga kalainan.
Matud pa niya, nagtigom sa Pilipinas ang mga lider sa 11 ka miyembro sa ASEAN aron hisgutan ang mga hiniusang solusyon sa labing dinaliang mga isyu sa rehiyon, ilabina sa energy ug food security, patigayon, ug kaluwasan sa mga ASEAN nationals nga naapektuhan sa nagpadayon nga panagbangi.
Samtang si Trade Secretary Maria Cristina Roque nagkanayon nga tukma sa panahon ang hiniusang ministerial meeting tungod kay ang mga hagit nga giatubang sa rehiyon dili lang kutob sa foreign policy o economic policy.
Matud pa, ang mga isyu sama sa energy security, kahimtang sa patigayon, ug supply chain resilience naapektuhan sa geopolitical developments ug mga desisyong pang-ekonomiya.
Photo credits: Cebu Province
