Gitunol sa Department of Migrant Workers (DMW) Region 9 ang kantidad nga ₱75,000 nga financial assistance alang sa mga Overseas Filipino Workers (OFWs) nga nagsakit gikan sa Middle East nga nakapauli na sa probinsya sa Zamboanga del Sur.
Kini subay sa gibutyag ni DMW 9 Regional Manager Iris Gay Tangcalagan atol sa pakighinabi sa mga grupo sa media atol sa Labor Day niadtong Mayo 1, 2026.
Gisaysay ni RD Tangcalagan, ang pipila ka mga OFWs nga dili na makahimo sa paglakaw paingon sa ilang opisina, sila na mismo ang nagbisita aron marelease ang P75,000.00 nga action fund financial assistance.
Tuyo matod pa sa maong ayuda aron matabangan ang panginahanglanon sa mga OFWs, ilabina kadtong nakasinati og kalisod ug sakit samtang nagtrabaho sa gawas sa nasud.
Segon pa niya, padayon ang ilang paningkamot sa paghatag og suporta sa mga naapektuhan nga migrant workers, lakip na ang financial assistance, reintegration programs, ug ubang serbisyo aron makatabang sa ilang pagbangon pag-usab samtang naa na sa ilang matag lugar.
