Padayon nga nangandam ang Agusan del Sur, alang sa pag-host sa Palarong Pambansa 2026. Baynte ka adlaw sa dili pa ang pag-abli, gipahibalo ni Gobernador Santiago Cane Jr. nga anaa na sa 97.25% ang ilang preparasyon.
Matod sa gobernador, finishing touches na lang ang gihimo sa pito ka mga playing venues. Bisan pa man sa mga hagit sama sa pagsaka sa presyo sa lana ug mga paliton, lakip na ang pagka-langan sa konstruksyon tungod sa sige nga pag-ulan niadtong miaging tuig, determinado ang probinsya nga humanon ang tanan sa dili pa ang Mayo 24.
Gilauman nga ang Patin-Ay Sports Complex ang mahimong sentro sa aksyon diin dagsaon ang liboan ka mga atleta gikan sa nagkalain-laing rehiyon sa nasod. Gipatuman usab sa kagamhanan ang “austerity measures” o pagdaginot aron masiguro nga magmalampuson ang sports event.
Gawas sa mga playing venue, andam na usab ang mga billeting quarters nga puy-an sa mga atleta. Kini ang labing unang higayon nga mo-host ang Agusan del Sur sa Palaro, usa ka garbo alang sa tibuok rehiyon sa Caraga.
Photo courtesy: Agusan del Sur – Palarong Pambansa 2026/ Facebook
