Sa Thailand, usa ka 22-anyos nga lalaki ang nakahuna-huna og “lain klase nga lingaw” human siya miangkon nga siya mismo ang nagpasiga og sunog sa lasang—tungod lang kay bored matod pa siya.
Nasakpan sa forest rangers ang suspek sa Kaeng Hat Oi Forest, diin sunod-sunod na ang report sa mga sunog. Nakit-an siyang nagdala og lighter ug walay klarong rason sa iyang presensya sa maong dapit, maong gidala siya sa estasyon para imbestigahan.
Didto, kalma ra siyang miingon nga siya ang nagsugod sa sunog aron malingaw ug makita kung unsaon sa mga rangers pagpalong sa kalayo. Sa yano nga pagsabot—naghimo siyag problema aron malingaw sa solusyon.
Tungod niini, giatubang niya karon ang kaso sa pagdaot sa kalikupan ug nagpabilin sa kustodiya sa pulis samtang ginahulat ang posibleng silot.
Bisan pa og murag kataw-anan ang rason, seryoso ang epekto niini ilabina kay nag-atubang na daan og daghang forest fires ang Thailand.
Busa pahimangno sa tanan—kung bored ka, ayaw gyud tawn og sunog-sunog. Kay ang ending, dili lang kalayo ang imong mapa-init, kundi apil na mawala ang imong kaugmaon.
Photo courtesy: Oddity Central
