Nanguna nga kandidato pagka-presidente sa 2028 presidential race sila si Bise Presidente Sara Duterte, kanhi Bise Presidente Leni Robredo ug Sen. Raffy Tulfo, base sa pinakaulahing presidential preference survey sa Pulse Asia Research Inc. nga gihimo gikan Pebrero 27 hangtod Marso 2, 2026.
Sa nasangpit nga survey, sila si Duterte ug Robredo gamay ra ang ligas human nakakuha og 51% nga ratings itandi sa 43% ni Robredo.
Nanguna si Duterte sa Mindanao (93%) ug Visayas (67%) samtang nakuha ni Robredo ang Balance Luzon (67%).
Nag-una sab si Robredo sa National Capital Region (NCR) nga adunay 42% nga ratings, apan duol ra sa luyo si Duterte (41%).
Kon socio-economic class ang hisgutan, si Robredo gipaboran sa Class ABC (63%) samtang si Duterte gipaboran sa Class D (53%) ug Class E (74%).
Samtang, kon itandi si Duterte kang Tulfo, ang duha adunay statistical tie o 46% ratings matag usa. Nagpabiling lig-on ang suporta sa bise presidente sa Mindanao (90%) ug Visayas (64%) samtang ang senador maoy labaw sa Balance Luzon (72%), itandi sa 19% ni Duterte.
Sama kang Robredo, si Tulfo nag-una sab sa Class ABC human nakakuha og 49% nga ratings samtang si Duterte gisuportahan sa Class E, 63%. Ang duha suod sa Class D, si Duterte sa 48% samtang si Tulfo gisuportahan sa 47%.
Sa gihapon, 6%-7% sa mga Pilipino nagpabiling “undecided”.
Photo Courtesy: Philstar
