Gipahibalo sa mga otoridad nga mokabat sa 13 ka mga indibidwal ang nakabsan sa kinabuhi human sa mga airstrike nga gilusad sa Israel ngadto sa Lebanon.
Sumala sa Lebanese health ministry nga upat ka mga babaye ug usa ka bata ang lakip sa mga namatay ingon man daghan usab ang naangol sa maong insidente.
Base sa mga taho nga walo ka indibidwal ang namatay sa Haboush sa distrito sa Nabatieh, diin duha niini mga babaye ug usa ka bata, samtang laing upat usab ang nawad-an sa kinabuhi sa Zrarieh sa distrito sa Sidon.
Taliwala sa tulo ka semana nga gipatuman nga hunong-buto tali sa Hezbollah ug Israel, padayon gihapon ang ilang panagbanggi nga nagresulta na sa daghang kaswaltis ug daghang mga imprastraktura ang nangaguba.
Kahibaloan nga gipatuman ang 10 ka adlaw nga hunong-buto niadtong Abril 16 human sa mga pakigpulong tali sa mga embahador sa Lebanese ug Israel sa Washington. Apan bisan paman sa panaghisgot, nagpadayon ang tensyon nga nakaapekto na sa daghang mga indibidwal lakip na sa ekonomiya.
Photo Courtesy: Inquirer
