Gipahigayon sa Agusan del Sur Provincial Sports and Development Services Office ug Provincial Health Office ang usa ka Medical ug Dental Mission alang sa mga atletang pambato sa Caraga Region isip pagpangandam sa umaabot nga Palarong Pambansa 2026 karong bulan sa Mayo.
Giseguro sa maong mga buhatan ang maayong kondisyon sa mga atleta pinaagi sa pagtanyag og libreng vital signs monitoring, physical assessment, medical consultation, ug mental health assessment. Gilakip usab sa maong serbisyo ang libreng pag-ibot sa ngipon ug pagpanghatag og mga resetang tambal aron maseguro nga anaa sa saktong panglawas ang mga magdudula.
Gipaniguro usab sa kadagkoan sa Provincial Sports ug Health Office nga magpadayon ang ilang pagtinabangay alang sa kaayohan sa mga atleta sa panghinaot nga makahatag sila og garbo ug makuha ang labing maayong performance sa natad sa paugnat sa kusog.
Angayang masayran nga nakatakda ang ika-66 nga edisyon sa Palarong Pambansa karong Mayo 24 hangtod 31, 2026, nga ipahigayon diha sa D.O. Plaza Memorial Sports Complex sa Prosperidad, Agusan del Sur.
Photo courtesy: Agusan Del Sur PHO
