Gikumpirma sa Jakarta Search and Rescue Agency nga pito ka indibidwal ang namatay samtang 85 ka tawo ang daling gidala sa balay tambalanan alang sa medikal nga pagtambal human sa nahitabong disgrasya sa Indonesia.
Tungod niini, nagmando ang Presidente sa Indonesia nga si Prabowo Subianto og imbestigasyon kabahin na sa maong insidente.
Matod pa sa usa ka survivor sa commuter train nga si Sausan Sarifah, nga ang maong insidente makalilisang samtang anaa pa siya natanggong sulod sa naguba nga karwahe sa sakyanan. Dugang pa niya nga gikan siya sa trabaho ug pauli na unta sa ilang panimalay.
Gisaysay pa niini nga ayha paman nahitabo ang insidente, nakadungog siya ug duha ka anunsyo nga andam na ang mga pasahero sa pagkanaog, apan kalit lang nadungog nila ang kusog nga tingog nga misangpot na sa pagkabangga.
Sa kasamtangan ang mga otoridad padayon pa sa ilang imbestigasyon samtang ang mga nasamdan padayon pa nga nagpaalim sa balay tambalanan.
Photo Courtesy: DotDotNews
