Ospital ang gitugpahan sa duha ka sakay sa motorsiklo human nasangit sa barikada sa checkpoint sa kapulisan diha sa National Highway, Barangay New Cuyapo, Tantangan, South Cotabato, taknang alas-9:55 sa gabii niadtong milabayng adlaw.
Ang mga biktima naila nga silang alyas Jude 20 anyos ug alyas boy menor de edad parehong residente sa Barangay Mangilala sa nasampiot nga lugar.
Subay sa imbistigasyon sa kapulisan sa Tantangan MPS nga gikan sa usa ka convenience store sa Poblacion, Tantangan ang duha ug paingon sa Tacurong City sa dihang wala kini mamatikdi sa drayber ang checkpoint nga gipahigayon sa 2nd Maneuver Platoon sa 1st South Cotabato Provincial Mobile Force Company.
Tungod niini, nasangit ang motorsiklo sa barikada ug nabangga ang usa ka ligid sa goma nga gibutang duol sa checkpoint sa mga otoridad hinungdan nga nanglupad ang drayber ug angkas ug nakaangkon ug samad bun-og sa kalawasan.
Dugang sa imbestigasyon, kapulisan nga lango sa ilimnon makahubog ang rider ug ang menor de edad nga angkas. Ug wala kini nagsul-ob og helmet ug protective gear atol sa maong insidente.
Gibanabanang mokabat sa 4,000 pesos ang kadaot sa motorsiklo nga gidala na sa Tantangan MPS alang sa hustong disposisyon.
Photo courtesy: Tantangan MPS| fb page
