Gisuspendi sa Department of Interior and Local Government (DILG) ang duha ka opisyal sa Sangguniang Kabataan (SK) sa Makati, human nalambigit sa mga pasangil sa kurapsyon.
Giila sa DILG ang mga nasuspenso nga SK officials nga sila si Natalia Georgianna Tupaz sa Barangay Dasmariñas ug Cecilia Louise Yabut sa Barangay Magallanes, Makati City.
Gisuspendi si Tupaz og unom ka bulan human giingong nangayo og 20% nga kickback gikan sa usa ka supplier alang sa usa ka Halloween project.
Sumala sa imbestigasyon, ang mga mensahe sa Viber ug mga rekord sa tawag sa telepono nagsuporta niini. Nalambigit usab siya sa giingong pagpalsipikar og pirma sa SK resolution.
Samtang si Yabut gisuspendi og tulo ka bulan human giingong misumiter og mga dokumento nga adunay peke o dili awtorisado nga pirma, lakip na ang pirma sa usa ka SK member nga anaa sa gawas sa nasud niadtong higayona.
Matod ni Interior Secretary Jonvic Remulla, posibleng mag-atubang si Tupaz og kasong direct bribery, kalapasan sa Republic Act No. 3019, ug falsification of public documents sa Office of the Ombudsman.
Gumikan sa maong hitabo, nanawagan karon si Remulla nga ikonsiderar ang pagbungkag sa SK, ug ipasa na hinuon ngadto sa mga barangay council ang assignment sa mga representante sa kabatan-onan.
Gihisgutan usab niya ang taas nga attrition rate sa mga opisyal sa SK, diin daghan ang mobiya sa pwesto tungod sa pagtuon, trabaho, o kaminyoon, hinungdan nga adunay mga interim officers.
Kahinumduman, nga unang gisugyot ni Remulla ang posibilidad nga wagtangon ang SK, uban ang panawagan alang sa reporma sa youth representation system sa barangay level.
Photo Courtesy: Rappler
