Nadakpan sa mga otoridad ang usa ka suspetsado human makuhaan og ilegal nga droga sa gipahigayon nga buy-bust operation didto sa Purok-1, Barangay San Teodoro, Bunawan, Agusan del Sur, buntag sa Abril 24, 2026.
Ang maong operasyon gilunsad sa hiniusa nga pwersa sa Bunawan Municipal Police Station ubos sa pamunoan ni PMAJ Ronald S. Baiño, inabagan sa PDEA Agusan del Sur ug PDEA 13 kundiin nakuha gikan sa posisyon sa suspetsado ang usa ka dako nga sachet ug walo ka gagmay nga pakete sa gituohang shabu nga motimbang og mokabat sa unom ka gramo ug adunay gibana-bana nga kantidad nga Php40,800.00. Lakip usab sa mga nasakmit ang usa ka pakete sa sigarilyo, Php500 nga buy-bust money, Php3,000 nga boodle money, ug usa ka unit sa ADV 160 nga motorsiklo nga kolor puti.
Atol sa maong panghitabo, dayong gidala ang dinakpan sa Bunawan MPS human mapahibalo sa iyang mga katungod ilalom sa balaod alang sa tukmang dokumentasyon ug pagpasaka og kaso kalambigitan sa paglapas sa RA 9165 o Comprehensive Dangerous Drugs Act of 2002.
Gipasalig sa kapulisan sa Bunawan nga magpadayon ang ilang kampanya batok sa ilegal nga droga ug nanawagan sa publiko nga padayong mo-kooperar aron mapadayon ang kahapsay ug kalinaw sa komunidad.
Photo courtesy: Bunawan MPS
