Gipaabot nga makatagamtam og dugang kaharuhay ang mga motorista sa sunod semana tungod sa gilaumang ikatulo nga sunod-sunod nga rollback sa presyo sa lana, partikular na sa diesel.
Sumala sa banabana sa mga tinubdan sa industriya base sa upat ka adlaw nga dagan sa Mean of Platts Singapore (MOPS) ug palitan sa dolyar, posibleng mokunhod ang presyo sa diesel og Php8.00 ngadto sa Php10.00 matag litro.
Samtang sa pikas bahin, ang gasolina gilauman nga walay kausaban sa presyo o mahimong mosaka og gamay nga Php1.00 matag litro.
Kini nga mga adjustment nagsubay sa MOPS, ang benchmark sa presyo sa mga refined petroleum products sa tibuok Asya.
Ang gipaabot nga pag-usab sa presyo karong sunod semana magsunod sa dako nga rollback niadtong Abril 21, 2026, diin ang diesel ninaog og kapin sa Php24.00 matag litro. Kini nga mga rollback nagsilbing dakong tabang sa mga negosyante ug sektor sa transportasyon human sa serye sa mga pagtaas sa presyo tungod sa tensyon sa Middle East.
Gipaabot nga ipahibalo sa mga kompanya sa lana ang pinal nga presyo karong Lunes, nga ipatuman sa adlawng Martes.
Photo courtesy: Endurance Warranty
