Moabot sa dul-an 3,000 ka mga kabog ang naitala sa gipahigayon nga monitoring activity sa Barangay Pinol, Maitum Sarangani Province niadtong Abril 22, sumala sa Community Environment and Natural Resources Office (CENRO) Kiamba.
Ang maong monitoring gihimo pinaagi sa pagtinabangay sa Barangay Local Government Unit (BLGU) sa Pinol ug sa Municipal Environment and Natural Resources Office (MENRO) sa Maitum isip kabahin sa pagsusi sa kahimtang sa wildlife sa maong dapit.
Sumala sa taho, ang kadaghan sa mga kabog maoy ebidensya sa maayong kahimtang sa biodiversity sa nasabing lugar. Bisan pa man og adunay namatikdan nga ginagmay nga kausaban sa ilang mga puy-anan tungod sa natural nga mga rason ug kausaban sa suplay sa pagkaon, gipakita niini ang katakos sa mga kabog nga mo-adjust sa ilang palibot.
Importante ang presensya sa mga kabog nga dakong tabang sa pagpakaylap sa mga bulak. Sila ang motabang sa pagpakaylap sa mga liso sa prutas aron motubo ang bag-ong mga kahoy. Nakatabang sila sa pagmintinar sa kabaskog sa atong mga lasang.
Padayon karon nga gipahugtan sa CENRO Kiamba ang ilang mga lakang sa conservation ug monitoring aron mapanalipdan ang wildlife ug mapabilin ang balanse sa kinaiyahan sa maong dapit.
