Gipahibalo sa National Food Authority (NFA) nga mopalit na sila og palay o tipasi sa humay sa presyo nga ₱30 kada kilo. Kini nga lakang gituyo aron matabangan ang mga mag-uuma nga apektado sa pagsaka sa gasto sa produksyon.
Ubos sa flexible Price Range Scheme (PRICERS), nagsugod ang NFA sa pagpalit sa limpyo ug uga nga palay sa maong presyo sa mga probinsya sa Bulacan ug Nueva Ecija.
Sumala kang NFA Administrator Larry Lacson, ang maong programa makatabang sa mga mag-uuma nga makabawi sa ilang gasto, ilabi na sa mahal nga presyo sa gasolina nga gigamit sa pagpanguma. Giingon niya nga panahon sa ting-ani, importante nga mapahupay ang palas-anon sa mga prodyuser sa bugas.
Gipasiugda usab sa NFA nga ang mas taas nga buying price makapugong sa dali nga pag-ubos sa presyo sa palay nga ginabaligya sa mga trader, aron dili maapektuhan ang kita sa mga mag-uuma ug adunay kapilian nga direkta nga mabaligya sa gobyerno.
Dugang pa, ang maong palisiya makatabang sa paglig-on sa suplay sa bugas sa nasud pinaagi sa national rice buffer stock, nga gamiton panahon sa kalamidad ug krisis.
Photo Courtesy: Business Mirror
