Abante na sa final play-in sa NBA play-in tournament ang Charlotte Hornets human nila malusutan ang Miami Heat pinaagi sa usa ka kulba-hinam nga overtime game sa iskor nga 127-126. Nahimong yawe sa kadaugan sa Hornets ang points sa nahabiling 4.7 segundos sa OT aron makuha ang labaw.
Tungod kay hurot na ang time-out sa Heat, nisuway sila sa pag-apas apan napakyas tungod sa gihimong hugot nga depensa sa Hornets. Nahimong dakong hagit alang sa Miami ang maong dula human nawala ang ilang star center nga si Bam Adebayo kinsa nakaangkon og injury sa ikatulong quarter sa maong panagsangka.
Sa pagkakaron, magpaabot na lang ang Hornets sa modaug tali sa panagsangka sa Philadelphia 76ers ug Orlando Magic alang sa ilang final play-in matchup karong umaabot nga Biyernes. Ang kinsa man nga modaug sa maong final play-in mao ang makakuha sa ika-walo nga pwesto sa Eastern Conference ug makaatbang sa Detroit Pistons alang sa unang round sa playoffs.
Photo Courtesy: Chicago Tribune
