Arestado ang usa ka lalaki human kini madakpan sa mga otoridad samtang nagbitbit og illegal nga armas didto sa Purok Nangka, Barangay Pres. Roxas, RT Lim, niadtong nakalabay nga adlaw.
Sumala pa nga usa ka concerned citizen ang mireport s sa RT Lim Municipal Police Station,matod pa nga adunay usa ka armadong tawo nga ilang namatikdan sa nasampit nga dapit.
Tungod sa dinaliang aksyon sa mga personahe sa PNP, naapsan ug nasikop ang suspek—nga nailang usa ka hingkod ang panuigon ug residente sa Isabela City. Nakuha gikan sa posisyon sa dinakpan ang usa ka improvised 12-gauge homemade shotgun nga kolor light blue.
Ang suspek gidala na sa RT Lim MPS alang sa dugang imbestigasyon ug pasakaan og kasong paglapas sa Republic Act 10591 o ang Comprehensive Firearms and Ammunition Regulation Act.
