Nagtala og pagkunhod sa kinaubsan nga ang-ang sulod sa siyam ka bulan ang padalang kuwarta sa mga Overseas Filipino Workers (OFW) niadtong bulan sa Pebrero, apan nagpabiling mas taas ang kinatibuk-ang pondo nga nisulod sa nasod karong tuiga.
Base sa datos nga gipagawas sa Bangko Sentral ng Pilipinas (BSP) niadtong Miyerkules, niabot lamang sa $2.786 bilyon (₱167.08 bilyon) ang natala nga cash remittances o ang mga padala nga miagi sa bangko niadtong Pebrero. Mas ubos kini kon itandi sa $3.020 bilyon (₱181.11 bilyon) nga natala niadtong bulan sa Enero.
Kini na ang kinaubsan nga ang-ang nga natala sukad pa niadtong Mayo 2025. Bisan pa niana, mas taas kini og gamay kon itandi sa $2.716 bilyon nga natala niadtong Pebrero sa miaging tuig. Gikan sa kinatibuk-ang cash remittances sa nahisgutang bulan, nagagikan ang $2.25 bilyon sa mga land-based workers, samtang nihatag usab og amot nga $0.53 bilyon ang mga sea-based workers.
Luyo sa pag-ubos niadtong Pebrero, gitaho sa BSP nga niabot gihapon sa $5.806 bilyon (₱348.19 bilyon) ang year-to-date cash remittances sa unang duha ka bulan sa tuig. Mas taas kini kon itandi sa $5.633 bilyon sa parehong panahon niadtong 2025.
Photo courtesy: Inquirer
