Gilauman nga makasinati na usab og grabeng pagsaka sa presyo sa lana ang mga motorista sa sunod nga semana. Kini human sa temporaryong rollback nga natagamtaman niadtong Martes, Abril 14, 2026.
Sumala pa sa Department of Energy, gilauman ang mosunod nga bana-bana sa adjustment kada litro karong umaabot nga martes, sa diesel nga mosaka ngadto sa Php16.50 hangtod Php17.50 kada litro og sa Gasoline nga mosaka ngadto sa Php7.50 hangtod Php8.50 kada litro.
Ang maong dakong pagsaka sa presyo hinungdan sa nagpadayong krisis ug tensyon sa Middle East nga naghatag og dakong epekto sa supply sa krudo sa tibuok kalibutan.
Kahinumduman nga kaniadtong niaging semana, nakasinati ang nasud og “big time rollback” diin ang diesel miusos og kapin sa Php20 kada litro, apan daling naputol ang maong kaharuhay tungod sa wala masulbad nga kagubot sa gawas sa nasud.
Tungod niini, giawhag ang mga motorista, ilabi na ang mga drivers sa pampublikong sakyanan ug delivery riders, nga mangandam sa maong adjustment. Gilauman usab nga opisyal nga ipahibalo sa mga kompanya sa lana ang pinal nga kantidad sa umento karong umaabot nga Lunes.
Photo Courtesy: Inquirer.net
