Gisaka ang Mount Apo sa usa ka pamilyang foreigner gikan sa Hawaii sulod lamang sa 10 oras atol sa Holy Week break nga nakahatag og inspirasyon.
Matod pa ang maong bukid giila isip labing taas sa Pilipinas nga bukid may gitas-on 2,954 metros, kasagarang makuha og duha hangtod tulo ka adlaw aron makompleto ang imong pag abot, apan nahuman kini sa maong pamilya sulod lang sa usa ka adlaw pinaagi sa Kapatagan Trail sa Digos City.
Sa video nga gipakita ni Ronel Bravo Guiang, nakita ang mga bata nga maampingon nga niagi sa batuon ug titip nga bahin sa agianan, nga usa sa labing lisod nga parte sa pagsaka. Bisan pa sa kakapoy ug kalisog sa agianan, ilang napakita ang disiplina, kusog sa lawas, ug determinasyon hangtod nakaabot sila sa kinatumyan.
Sumala sa ilang giya nga si Arnie Macañeras, dako ang iyang pagdayeg sa pamilya tungod sa ilang kahibalo sa safety protocols, maayo nga pacing, ug kusog sa paglahutay sa tibuok paglakaw.
Dugang pa niya, eksperyensyado na sa trail running ang mga ginikanan samtang aktibo usab sa hiking ug outdoor adventures ang ilang mga anak, maong nakahatag kini sa ilang paspas ug luwas nga pagsaka.
Photo Courtesy: Arn’z Macaneras
