Usa ka talagsaon nga panghitabo ang midangat sa programa ni Raffy Tulfo, diin usa ka bana mismo ang midangop aron ireklamo ang iyang asawa—tungod sa pagkaadik niini sa pagtan-aw sa maong programa.
Sumala sa bana, napasagdan na sa iyang asawa ang ilang duha ka anak, tungod kay gikan buntag hangtod gabii sige na lamang kini ug tan-aw sa mga episode ug video sa social media nga may kalabotan sa mga kaso nga gipadala sa programa.
Giangkon usab sa asawa nga dili kompleto ang iyang adlaw kung dili siya makatan-aw sa programa, ug mitug-an nga nahimo na kini niyang bisyo nga nakaapekto na sa iyang responsibilidad isip inahan.
Dugang pa sa bana, adunay higayon nga ang kwarta nga gituyo unta para sa eskwelahan sa ilang mga anak, gigamit sa asawa sa pagpalooad aron makapadayon sa pagtan-aw online.
Tungod niini, nangayo og tabang ang bana sa programa ni Tulfo, ug nagpakita og kasuko sa sitwasyon nga ilang giatubang karon isip pamilya.
Sa pikas bahin, matod pa ni Tulfo, iyang gipasalamatan ang pagsalig sa publiko sa iyang programa, apan iyang gipahinumduman nga dili angay himuong prayoridad ang pagtan-aw niini ug likayan ang pagkaadik aron dili mosangpot sa problema sulod sa pamilya.
Photo Courtesy : KUYA YANG
