Padayon ang gipahigayon nga backtracking sa mga awtoridad sa Kidapawan City aron masuta ang posibleng rota sa pag-ikyas sa mga suspetsado, human sa nahitabong pagpanulis sa A.V. Pawnshop niadtong adlawng Sabado sa Kidapawan City, Cotabato.
Diin mokabat sa ₱13 milyones nga kantidad sa mga alahas ang nadagit sa unom ka mga armadong suspek human gitulis ang nasampit nga establisyemento. Sumala sa report sa kapulisan, target sa mga suspek ang A.V. Pawnshop diin dali nilang nakuha ang mga mahalong alahas. Human sa panghitabo, daling misibat ang mga tulisan sakay sa duha ka motorsiklo paingon sa wala matinong direksyon.
Nagpahigayon gilayon ang Kidapawan City Police Station og hot pursuit operation ug makuting imbestigasyon aron mahibaw-an ang pagkatawo sa mga responsableng suspetsado.
Sa pagkakaron giawhag ang publiko nga magtinabangay pinaagi sa paghatag sa bisan unsang kasayoran nga makatabang sa paspas nga pagsulbad sa maong kaso.
