Mokabat sa kapin 200 milyon ang natigom nga gasto sa kuryente sa dul-an 158 ka malls sa tibuok nasud human nilang gi-adjust ang ilang operasyon tali sa nagpadayon nga global oil crisis, sumala sa Department of Energy.
Gipadayag sa DOE nga ang mga shopping centers sama sa Araneta, SM, Rockwell, Robinsons ug Megaworld Lifestyle malls nakamenos og konsumo nga moabot sa 23 megawatts pinaagi sa lain-laing energy efficiency measures nga nagtumong sa pagpagaan sa pressure sa power system.
Dungan niini, misalig usab ang pipila ka malls sa renewable energy pinaagi sa pagpalapad sa rooftop solar ug pag-apil sa Green Energy Option Program (GEOP), nga nagtugot sa mga konsyumer nga adunay average nga konsumo nga 50 kilowatts matag bulan nga makapili sa ilang gustong renewable power supplier.
Sa bahin sa gobyerno, mikunhod usab og 14 porsyento ang konsumo sa fuel ug kuryente sa mga opisina sa gobyerno, nga mitumbok sa energy savings nga hapit 700 kW.
Sumala pa sa DOE, ang maong mga tinigom resulta sa mas episyenteng operasyon sama sa husto nga paggamit sa enerhiya sa mga pasilidad ug pagpraktis sa fuel efficiency samtang nagpadayon ang paghatag og serbisyo publiko.
Gipadayon sa gobyerno ang pag-awhag sa energy efficiency ug fuel-saving measures samtang gisagubang sa nasud ang energy emergency nga mitumaw tungod sa krisis sa Middle East.
Photo Courtesy: Newspapers.ph
