Gihingusgan ang ordinansa sa syudad ang pagbawal sa pag drive kung anaa sa impluwensiya sa ilimnong makahubog. Samtang ang uban padayon gihapon sa pagsupak hinungdan nga adunay pipila ka mga aksidente ang mahitabo sa kadalanan.
Hinuon, didto sa nasod sa Germany, adunay usa ka talagsaong hitabo ang nakakuha sa atensyon sa katawhan human ang tulo ka managhigala, kinsa anaa sa impluwensya sa ilimnong makahubog nakahukom nga itulod na lang ang ilang sakyanan imbes nga imaneho kini pauli.
Ang ilang tumong mao unta ang paglikay sa bug-at nga kaso sa drunk driving, sa pagtuo nga kon dili nila drayban ang sakyanan, wala silay malapas nga balaod sa trapiko.
Apan ang maong “diskarte” niresulta hinuon ngadto sa paglapas sa trapiko human sila naka ingon sa traffic tungod kay nakababag sila sa dalan, tungod niini naka multa hinuon ang tulo ka managhigalang hubog.
Nagpahinumdom kini kanato mga kajuander nga usahay mangita kita og paagi aron makalikay sa responsibilidad, bisan pa og sayop ang gibuhat. Bisan og gihimo na nato ang atong kaugalingon nga kataw-anan, nagpadayag kini sa kakulang sa disiplina sa kaugalingon.
Ang leksyon niini mao nga dili angay likayan ang responsibilidad pinaagi sa pagpanglimbong, kay ang tinuod nga integridad makita sa pag-angkon sa sayop. Importante ang pagdisiplina sa kaugalingon ug pagsunod sa balaod, aron malikayan ang mas dako nga problema ug kadaot sa umaabot.
Photo Courtesy:fP
