Nasikop ang usa ka indibidwal ug nakompiska ang iligal nga armas atol sa gipahigayon nga search warrant operation sa Sulop, Davao del Sur kagabii Abril 11, 2026. Ang nadakpan giila nga si alyas “Nel-Nel,” 35-anyos, minyo, ug security guard, residente sa Barangay Kiblagon sa maong lungsod.
Sumala sa Sulop Municipal Police Station, ang operasyon gipangulohan ni PLT Mary Ann N. Rabaño ubos sa supervision ni PCPT Ronald D. Ditan, Officer In Charge, uban sa koordinasyon sa lain-laing unit sa kapulisan.
Narekober gikan sa suspek ang usa ka .38 caliber nga pistola nga walay serial number, upat ka buhing bala, ug usa ka sling bag. Gipatuman ang search warrant diha sa presensya sa mga barangay opisyal isip insulating witnesses aron masiguro ang legal nga proseso.
Ang suspek karon anaa na sa kustodiya sa kapulisan samtang giandam ang kasong paglapas sa Republic Act 10591 o ang Comprehensive Firearms and Ammunition Regulation Act. Padayon usab nga gipahimangno sa kapulisan ang publiko batok sa pagpanag-iya og ilegal nga armas aron mapadayon ang kalinaw ug kahapsay sa komunidad.
Photo Courtesy: Sulop Municipal Police Station
