Magpagawas og kapin ₱19 bilyon nga loan refund ang Government Service Insurance System alang sa dul-an 1.37 milyon ka miyembro ug pensyonado ubos sa ilang “Balik Ginhawa” program.
Imbes nga magpatuman og payment moratorium o temporaryong pagpahunong sa bayad, gipili sa GSIS ang paghatag og lump-sum refund nga katumbas sa hangtod tulo ka bulan nga amortization.
Sakop niini ang mga miyembro nga padayon nagbayad sa ilang loan gikan Disyembre 2025 hangtod Pebrero 2026. Ang matag benepisyaryo mahimong makadawat gikan ₱4,000 hangtod ₱39,000 matag bulan, ug posibleng moabot sa ₱117,000 ang total refund.
Matod ni Wick Veloso, mas epektibo kini nga paagi aron diretsong mahatagan og pinansyal nga kahayag ang mga empleyado sa gobyerno, ilabina sa panahon nga nagkinahanglan sila og dugang nga suporta.
Gipatin-aw usab sa GSIS nga ang refund alang lamang sa mga miyembro nga updated sa ilang bayranan sulod sa maong tulo ka bulan, ug dili apil ang mga nakalapas sa ilang obligasyon.
Ang GSIS maoy naghatag og social security benefits sa mga empleyado sa gobyerno lakip ang insurance, retirement ug loan assistance, nga nagpadayon sa ilang tumong nga matabangan ang ilang mga miyembro sa pinansyal nga aspeto.
Photo Courtesy: Serbisyo PH
