Gipatumba ni Emmanuel “Jimuel” Pacquiao Jr. si Darrick Gates pinaagi sa usa ka technical knockout (TKO) niadtong Sabado Abril 4 (Manila time) sa Pechanga Resort Casino sa Temecula, California.
Napildi ni Pacquiao ang 36-anyos nga si Gates sa ikaduhang round pa lang sa ilang upat ka round nga lightweight fight, kinsa nahimong bahin sa undercard sa IBF minimum weight title fight tali nilang Pedro Taduran ug Gustavo Perez Alvarez.
Gibombahan sa kamagulangan nga anak sa boxing legend nga si Manny Pacquiao og mga kombinasyon sa lawas ang maong bare-knuckle fighter sa wala pa kini niya gipahagba. Bisan pa man og nakabangon si Gates sa ihap sa referee, wala na kini kaagwanta sa sunod-sunod nga atake ni Pacquiao hinungdan nga giundang na ang maong panagsabong.
Kini nga kadaugan maoy nagsilbing dakong pasidungog alang sa 25-anyos nga boksidor human sa iyang debut fight niadtong Nobyembre batok ni Brendan Lally nga miresulta sa tabla nga dula.
Mitan-aw mismo sa maong boksing ang iyang mga ginikanan nga silang Manny ug Jinkee Pacquiao sa paghatag og suporta. Tungod sa maong resulta, misaka na sa 1-0-1 ang record ni Pacquiao uban ang usa ka knockout sa iyahang professional fight.
Photo Courtesy:inkl
