Usa ka bag-ong siyentipikong pagtuon nga nasulat sa journal nga Environmental Pollution nga ang mga pating o iho sa kadagatan sa Bahamas nagpositibo sa nagkadaiyang kemikal sama sa cocaine, caffeine, ug mga tambal batok sa kasakit (painkillers).
Human sa pagsusi sa dugo sa 85 ka iho gikan sa lima ka managlahing species sa Eleuthera Island, nasuta sa mga researcher nga 28 niini ang adunay nakitaan sa acetaminophen, diclofenac, ug caffeine, samtang usa ka iho ang direktang nagpositibo sa cocaine.
Sumala ni lead researcher Natascha Wosnick, usa ka biologist gikan sa Federal University of Paraná sa Brazil, ang maong mga kontaminante nag gikan sa hugaw nga tubig gikan sa mga imburnal, agos sa mga umahan, ug ang nagkadaghan nga mga turista nga direktang nagpagawas sa ilang hugaw ngadto sa kadagatan.
Samtang namatikdan ang kausaban sa metabolic markers sa mga iho nga nakainom sa maong mga substansiya, padayon pa nga gitun-an sa mga eksperto kon unsa ang dinalian ug malungtarong epekto niini sa kinaiya ug panglawas sa maong mga mananap sa usa ka dapit nga kaniadto giila nga limpyo ug “pristine” nga palibot.
Kini nga istorya naghatag og lawom nga pahinumdom kanatong tanan mga kajuander, bahin sa epekto sa atong binuhatan sa kalikupan. Nagpakita kini nga ang polusyon ug ilegal nga droga dili lang makaapekto sa tawo kundi bisan sa mga hayop sa kadagatan. Ang leksyon mao nga kinahanglan kita magmatngon ug responsable sa atong mga lihok, ilabi na sa pagpanalipod sa kinaiyahan. Kung dili nato kini tagdon, bisan ang inosenteng mga nilalang sama sa pating mahimong maapektohan sa kadaot nga atong gihimo.
