Nagtanyag ang nasud sa Malta og 25,000 euros (o mga 1.6 milyon pesos) sa mga residente nga boluntaryong mo-surrender sa ilang driver’s license sulod sa lima ka tuig, aron masulbad ang grabeng problema sa trapiko ug polusyon, usa ka talagsaon nga programa sa maong nasud.
Sumala ni Transport Minister Chris Bonett, ang “Driving License Surrender Scheme” nagtumong sa paghimo og “mobility shock” ilabi na sa mga batan-on, aron dili na sila maanad sa paggamit og pribadong mga sakyanan ug mas gusto ang pampublikong transportasyon.
Isip pinakagamay nga nasud sa Europe, ang Malta adunay usa sa pinakadaghang mga sakyanan ug gagmay nga mga dalan niini.
Aron mahimong kwalipikado, ang drayber kinahanglan nga 30-anyos o mas bata pa, residente na sa nasud sulod sa pito ka tuig, ug adunay lisensya sulod sa labing menos 12 ka bulan nga walay rekord sa seryoso nga mga kalapasan sa trapiko. Ang bayad ihatag pinaagi sa installment 5,000 euros kada tuig. Kung ang drayber magbag-o sa iyang hunahuna sa dili pa matapos ang lima ka tuig, kinahanglan niyang bayran ang kwarta nga iyang nadawat.
Ang gobyerno naggahin og €5 milyon nga pondo kada tuig, igo na para sa unang 1,000 ka benepisyaryo. Tungod ang gisurender nga lisensya isipon nga permanente nga kanselado, bisan kinsa nga gusto nga magmaneho pag-usab pagkahuman sa lima ka tuig kinahanglan nga moagi pag-usab sa 15 ka oras nga mga leksyon sa pagmaneho aron makakuha og bag-ong lisensya.
Nagpakita kini mga kajuander, sa kahimtang nga usahay kinahanglan og dako nga insentibo aron mausab ang batasan sa mga tawo alang sa kaayohan sa tanan. Og ang tumong lamang niini ang pagminus sa trapiko, polusyon, o pagpaayo sa sistema sa transportasyon.
Ang disiplina ug responsibilidad sa komunidad importante aron makab-ot ang kaayohan sa kadaghanan. Bisan pa og adunay madawat nga gantimpala o wala, ang tinuod nga kausaban magsugod sa atong kaugalingong desisyon, nga buhaton ang sakto para sa kalikupan ug sa katilingban.
