Sikop ang usa ka aktibong Barangay Kagawad human kini malambigit sa pagpayuhot ug illegal nga droga atol sa gikasang drug buy-bust operation niadtong Marso 28, didto sa Purok 1, Barangay Libuac, lungsod sa Rosario, Agusan del Sur.
Gilunsad ang hiniusang puwersa sa PDEA Regional Office 13 ug Rosario Municipal Police Station batok sa suspetsado kinsa nakuhaan og 26 gramos nga gituohang shabu nga nagkantidad og kapin Php176,000.00. Narekober usab gikan sa suspek ang buy-bust money, usa ka motor, selpon, ug ang iyang ID isip opisyal sa barangay human siya mabaligyaan sa usa ka undercover agent.
Gipasabot ni PDEA Regional Director Laurefel Gabales nga walay pilion ang balaod, opisyal man o ordinaryong lungsuranon, ilabi na nga usa ka dakong pagluib sa pagsalig sa publiko ang pagkalambigit sa usa ka sulugoon sa gobyerno sa ilegal nga droga.
Sa pagkakaron, naka kustodiya na ang maong kagawad sa PDEA 13, samtang giandam na ang kasong paglapas sa Republic Act 9165 o Comprehensive Dangerous Drugs Act of 2002.
