Nakadani og atensyon ang pinakagamay nga balay sa kalibutan sa Aucallama, Peru, nga adunay gidapdon nga 63 sentimetros (24 pulgada), nga posible pasidunggan nga mahimong pinakagamay nga balay sa kalibutan.
Gidisenyo ug gipanag-iya ni Fabio Moreno, ang mabulukon nga balay nagtumong sa pagpamatuod nga ang kalipay wala gibase sa gidak-on sa luna, apan kung giunsa nimo kini paggamit.
Bisan pa sa kagamay kaayo nga gidak-on niini, kompleto kini sa mga pasilidad sa usa ka modernong balay. Kini adunay banyo, kusina, kan-anan, sala, kwarto, lugar sa pagtuon, lugar sa paglaba, ug adunay duha ka hagdanan nga nagkonektar sa duha ka andana niini.
Ang balay nahimutang atbang sa main square sa Aucallama ug bukas sa mga turista nga gusto nga motan-aw. Bisan pa, tungod sa grabeng kahuot, imposible nga ang duha o daghan pa nga mga tawo mohaom sa sulod sa parehas nga oras, busa kinahanglan nga usa ra ka tawo ang mosulod niini matag higayon.
Si Moreno nagsumite na og aplikasyon sa Guinness World Records alang sa opisyal nga titulo. Bisan pa man og nagpaabot siya sa hingpit nga beripikasyon ug opisyal nga pagsukod sa mga eksperto, masaligon siya nga madala niya pauli ang nahisgutang world record.
Kini nga istoraya, nagpakita nga dili kinahanglan dako o mahal ang usa ka butang aron mapansin ug maapresyar. Usahay, ang kasimple ug pagka-unique mao’y makahatag og dakong kahulugan ug inspirasyon sa mga tawo. Busa mga kajuander, ang tinuod nga bili wala sa kadak-on o kadaghan, kundili sa kahulugan, kreatibidad, ug katuyoan sa usa ka butang.
Photo Courtesy:Oddity Central
