Usa ka talagsaong hitabo ang nahitabo sa Uttar Pradesh, India human nakamata gikan sa gitawag og braindead ang usa ka 50-anyos nga babaye tungod sa kusog nga pag-uyog sa ambulansya nga iyang gisakyan.
Ang pasyente giila nga si Vineeta Shukla, usa ka judicial staffer. Tungod sa iyang grabeng kahimtang, gidala siya sa ospital sa Bareilly diin gideklarar siya nga braindead sa mga doktor.
Sumala sa medical report, niubos sa 3 puntos ang iyang score sa Glasgow Coma Scale—layo kaayo sa normal nga 15 puntos—nga nagpasabot nga gamay na kaayo ang paglaum nga siya mamaayo.
Tungod niini, gidala siya sa iyang pamilya aron andamon na unta ang iyang lubong. Apan nabag-o ang tanan samtang nagbiyahe ang ambulansya duol sa Hafizganj. Nakaagi kini sa usa ka dako nga lubak nga hinungdan sa kusog nga pag-uyog.
Kalit namatikdan sa iyang bana nga mibalik sa normal ang pagginhawa ni Vineeta human sa maong hitabo. Dali-dayon siya gibalik sa ospital, ug nahibulong ang mga doktor sa iyang kalit nga pagmata.
Photo Courtesy: UNKNOWN FACTS
