Gikabalak-an nga posibleng mosaka ang presyo sa mga nag-unang palaliton sa nasod nga hinay-hinay na nga nabatyagan sa natad sa logistics, produktong petrolyo, ug mga input sa agrikultura.
Sumala sa Department of Agriculture (DA), mahimong mosaka ang presyo sa pipila ka pagkaon ubos sa “worst-case scenario,” ilabi na kung molungtad ang kagubot ug magpabiling taas ang presyo sa lana sa tibuok kalibutan.
Base sa record sa DA, mahimong mosaka ang presyo sa manok gikan sa Php200 hangtod sa Php324 matag kilo. Duyog niini, posible usab nga mosaka og hapit 49 porsiyento ang presyo sa well-milled rice gikan sa Php45 ngadto sa Php67 matag kilo.
Sa susamang report, giingon usab nga niadtong Marso 9, usa ka adlaw sa wala pa ang dakong oil price hike, anaa sa Php33 matag kilo ang lokal nga regular milled rice, apan misaka kini ngadto sa Php37 matag kilo, samtang ang imported rice usab nadugangan og hangtod Php5 matag kilo.
Nagpakita kini nga sa pagkakaron, adunay mga merkado pa nga dunay lig-on nga presyo, bisan tuod nagpabiling nagbitay ang pangutana kon hangtod kanus-a kini mapadayon kon mosamot pa ang sitwasyon sa merkado sa enerhiya sa kalibutan.
Nagpahimat-ngon usab ang DA nga ang epekto sa kagubot sa Middle East wala lamang nakatutok sa freight ug transport cost kondili lakip na sa presyo sa farm inputs, partikular na ang urea-based fertilizer, nga importante sa produksyon sa pagkaon.
Photo courtesy: Department of Agriculture – Philippines/ Facebook
