Gisusi og balik ni Department of Public Works and Highways (DPWH) Secretary Vince Dizon, uban ni Talisay City Mayor Gerald Anthony “Samsam” Gullas ug Provincial Governor Pamela “Pam” Baricuatro, ang dagan sa konstruksiyon sa flood control project sa Mananga River nga nahimutang sa Bgy. San Isidro ug Lawaan 2, Dakbayan sa Talisay.
Tumong sa maong inspeksiyon aron masiguro ang kalamboan sa pagpalapad sa suba human kini grabeng naapektuhan sa Bagyong Tino niadtong Nobyembre 2025.
Aron mapadali ang paghuman sa maong imprastraktura aduna kini gitagana nga igong pundo, gipahibalo sab ni Dizon nga ipaubos sa 24/7 nga operasyon ang konstruksiyon.
Segon sa secretary, anaa na sa kapin 50 porsyento ang nahuman sa maong proyekto og gitumong kini nga mahuman sa dili pa moabot ang ting-ulan aron maseguro ang kaluwasan sa mga lumulupyo, subay sa kamanduan sa Presidente sa nasud.
