Gipasalig sa Philippine Airlines (PAL) nidtong Miyerkules nga aduna silay igong suplay sa jet fuel alang sa ilang mga operasyon sa umaabot nga mga adlaw. Sa usa ka opisyal nga pamahayag, gipahibalo sa PAL nga nakig-alayon sila sa mga fuel suppliers, mga kauban sa industriya, ug sa gobyerno aron masiguro nga magpabiling lig-on ug hapsay ang ilang serbisyo.
Bisan pa man niini, giangkon sa maong flag carrier nga padayon nilang gibantayan ang lihok sa presyo ug suplay sa gasolina sa tibuok kalibutan tungod sa nagkausab-usab nga kondisyon sa merkado.
Kini nga pahayag gihimo dungan sa report sa budget carrier nga Cebu Pacific nga nagpahunong una sa pipila nila ka biyahe tungod sa pagsaka sa presyo sa gasolina sa kalibutan.
Sa laing bahin, gipahibalo sa Civil Aeronautics Board (CAB) ang pagsaka sa fuel surcharge gikan sa Level 4 ngadto sa Level 8 sugod karong Abril 1 hangtod 15. Tungod niini, magpaabot ang mga pasahero og Dugang bayad nga:
Php253 hangtod Php787 alang sa mga domestic flights.
Php835 hangtod Php6,209 alang sa mga international flights.
Aron maibanan ang epekto sa pagsaka sa pletehan, gipaubos sa Civil Aviation Authority of the Philippines (CAAP) ang airport landing ug terminal fees sugod sa Abril. Ang aeronautical fees alang sa pagtugpa ug paglupad sa ayroplano pagaminusan og hapit 50 porsyento.
Gipaubos usab ang international passenger service charge gikan sa Php900 ngadto sa Php700, samtang ang domestic travel charge sa mga international airports pagakunhuran gikan sa Php350 ngadto sa Php150 hangtod Php200.
Photo Courtesy: Skytrax
