Gipakunhod sa Department of Transportation (DOTr) ngadto sa ₱1 ang bayad sa pantalan alang sa mga sakyanan nga nagdala og produktong agrikultural aron masiguro ang padayon nga suplay sa pagkaon tali sa nasudnong energy emergency.
Ang lakang ipatuman sulod sa unom ka bulan pinaagi sa Philippine Ports Authority (PPA), subay sa direktiba ni Ferdinand Marcos Jr. aron maminusan ang epekto sa pagsaka sa presyo sa lana sa kalibutan tungod sa krisis sa Middle East.
Ilisan niini ang kasamtangang bayranan nga nagrange gikan ₱65 hangtod ₱516 depende sa klase sa sakyanan.
Ang ₱1 nga bayranan ipatuman alang sa Type 3 nga mga sakyanan sama sa light delivery trucks, vans ug pick-up, ug Type 4 nga heavy trucks nga nagdala og hilaw ug wala pa maprosesong produktong agrikultural sama sa bugas, mais, prutas, utanon, isda ug kahayupan.
Sumala ni Giovanni Lopez, Transportation Secretary, tumong sa lakang nga mapadayon ang pagbiyahe sa mga importanteng produkto bisan pa sa taas nga presyo sa krudo aron maprotektahan ang suplay sa pagkaon sa nasud.
Photo Courtesy: Philippine news agency
