Gipahimangnoan ang Integrated Provincial Health Office o IPHO Zamboanga del Sur ngadto sa publiko sa pagpili lamang sa mga botika nga namaligya ug anti-rabies vaccine nga aprobado sa Food and Drug Administration (FDA) aron malikayan ang peke nga bakuna.
Kini subay sa gibutyag ni Dahlia Aseniero, Health Education and Promotion Officer sa IPHO, atol sa pakighinabi sa Juander Radyo News Team. Dugang pa niya, ang paggamit sa dili rehistrado nga bakuna mahimong dili epektibo batok sa rabies ug posibleng makahatag og dugang risgo sa kahimsog sa tawo.
Gidasig usab ni Aseniero ang publiko nga adto lamang muduol sa mga lehitimong health centers, ospital, o lisensyadong tambalanan alang sa pagpabakuna batok sa rabies.
Sa kasamtangan, padayon ang kampanya sa IPHO Zamboanga del Sur sa pagpahimangno sa publiko batok sa rabies ug sila nagpadayon sa pagpalig-on sa kaluwasan sa panglawas sa komunidad.
