Gipaambit sa usa ka 40-anyos nga lalaki ang iyang makahahadlok nga kasinatian human siya ma-diagnose og brain hemorrhage pipila ka bulan pagkahuman niya mosakay sa usa ka high-speed roller coaster sa Ferrari World Abu Dhabi.
Sumala sa iyang post sa social media, nakabati siya og pagkalipong human sa ride apan wala niya kini tagda tungod kay abi niya temporaryo lamang. Apan pagbalik niya sa Taiwan, nakasinati siya og balik-balik nga sakit sa ulo sulod sa pipila ka bulan hangtod nga kalit siyang naluya ug gidali og dala sa ospital.
Didto nadiskobrehan nga adunay pagdugo sa iyang utok ug kinahanglang operahan dayon. Matod pa sa mga doktor, posible nga adunay kalabutan ang kusog nga lihok ug pwersa nga ma-experience sa mga roller coaster sa maong kondisyon.
Gipahinumdoman sa mga eksperto ang publiko nga importante ang pagtagad sa kaugalingong kahimtang sa panglawas sa dili pa mosulay og mga extreme rides sama sa high-speed roller coaster.
Kung makabati og dili kasagarang sintomas sama sa grabe nga sakit sa ulo, pagkalipong, o pag-usab sa panan-aw human sa ride, kinahanglan nga mokonsulta dayon sa doktor.
Photo Courtesy:Bashir Neuro Sphine Intitute
