Naka-ukit og kasaysayan ang 85-anyos nga si Kim Jeong-ja human siya nahimong pinakatiguwang nga naka-graduate sa kolehiyo sa South Korea.
Ang iyang kalampusan labi pang nakahatag og inspirasyon tungod kay nagsugod lamang siya og pagkat-on pagbasa ug pagsulat sa iyang kaugalingong pinulongan sa edad nga 78-anyos.
Bisan sa iyang kahimtang, wala siya nagpadaog ug nagpadayon sa pag-eskwela sulod sa pito ka tuig aron makab-ot ang iyang damgo.
Niadtong Pebrero, malipayon niyang nadawat ang iyang associate degree sa social welfare gikan sa Sookmyung Women’s University.
Sa iyang emosyonal nga graduation speech, gipahayag ni Kim nga ang iyang kalampusan dili lamang para sa iyang kaugalingon, kundili bunga usab sa kahibalo nga iyang nakat-onan ug sa walay hunong nga suporta gikan sa iyang mga kauban sa klase nga iyang nakauban sa pagtuon.
Nagpabilin siyang inspirasyon sa daghang tawo, ilabi na sa mga nagtuo nga dili na posible ang pagpadayon sa edukasyon bisan sa tigulang na nga edad.
Photo Courtesy: The Korea Times
