Mokabat sa 300 ka arnisadors gikan sa kapin 10 ka nasud ang gilauman nga mosalmot sa ika-6 nga Doce Pares World Arnis Championship nga ipahigayon sa Abril 9-12 sa City Mall Activity Center sa N. Bacalso Avenue syudad sa sugbo.
Sumala sa Supreme Grandmaster sa Doce Pares Eskrima Academy ug head organizer Arnulfo “Dong” Cuesta, kabahin kini sa paningkamot sa pagpadayon sa kabilin sa Doce Pares ug pagpreserbar sa espiritu sa mga nag-una niini.
Gilauman nga makigkompetensya ang mga eskrimadors gikan sa United States, Canada ug Europe batok sa mga Pilipinong mananapok sa upat ka adlaw nga torneyo nga gisuportahan sa kagamhanang lokal ubos sa pagpangulo ni Cebu City mayor Nestor Archival.
Isip pagpangandam, magpahigayon usab og duha ka adlaw nga Grandmasters Training sa Abril 8-9 aron mapalambo pa ang kahibalo ug abilidad sa mga partisipante pinaagi sa direktang pagtudlo sa mga eksperyensiyadong grandmasters.
Gipasalamatan usab ni Cuesta si Alvin Arcilla tungod sa bug-os nga suporta sa maong kalihokan nga gilauman makapausbaw sa sports tourism sa syudad.
Photo Courtesy: Doce Pares HQ fb page
